Monday, November 11, 2013

ဆီမီး ၁၀၀၀ ပန်း ၁၀၀၀ အယ်လ်အေ တန်ဆောင်တိုင်


(၅) ကြိမ်မြောက် ဆီမီး ၁၀၀၀ ပန်း ၁၀၀၀ တန်ဆောင်တိုင်ပွဲတော်ကို Los Angeles၊ လပွန်းတီမြို့ ရှိ ဗုဒ္ဓဘာသာမြန်မာဘုန်းကြီးကျောင်းတွင်၂၀၁၃ခုနှစ်၊ နိုဝင်ဘာလ ၉ရက်၊ စနေနေ့ ညနေ ၅ နာရီမှ ၉နာရီအထိ ကျင်းပခဲ့ရာ အယ်လ်အေမြို့ နှင့်အနီးတ၀ှိုက်မှ လူပေါင်း ၁၀၀၀ ခန့် ပွဲတော်ကို  တက်ရောက် ဆင်နွဲခဲ့ကြသည်။ 



ဘုန်းတော်ကြီးများက နမောတဿ သုံးကြိမ်ရွတ်ဆိုကာ အခမ်းအနားကိုစတင်ဖွင့်လှစ်ပြီး ငါးပါးသီလဆောက်တည်သည်။ တန်ဆောင်တိုင်မီးထွန်းပွဲနှင့်စပ်ဆိုင်သည့် တရားတော် ကို ကျောင်းထိုင်ဆရာတော် ဦးသုန္ဒရမှ ဟောကြားတော်မူသည်။ ထို့ နောက် ဆရာတော် ဦးကာရုဏိကမြတ်စွာဘုရားအား ဆီမီးနှင့်ပန်းဆက်ကပ်ပူဇော်လှူဒန်းချင်းတရားကို
ဟောကြားပေးပါသည်။ ထို့ နောက်ဆရာတော် သံဃာတော်များက မေတ္တာသုတ်တရားတော်ကို ရွတ်ဖတ်ပူဇော်ကြပါသည်။


ဆရာတော်များအား န၀ကမ္မ တို့ ဖြင့် ဆက်ကပ်လှူဒန်းပါသည်။
 

မန္တလေးဂေဇတ်သတင်းစာမှ မနီလာစိန်က ကျေးဇူးတင်စကား ပြောကြားပေးပြီးနောက် ဆရာတော် ဦးသီလစာရက ပြုလုပ်ခဲ့သော ကုသိုလ်ကောင်းမှု အစုစုအတွက် အမျှပေးဝေခဲ့ပါသည်။ ဗုဒ္ဓသာသနံ စိရံ တိဌတု သုံးကြိမ်ရွတ်ဆိုပြီး အခမ်းအနား ကို ရုပ်သိမ်းခဲ့သည်။ ထို့ နောက် ကျောင်းဝင်း တပတ် ဆီမီး လှည့်လည် ပူဇော်ခဲ့ပြီး ပွဲတော်သို့  တက်ရောက်လာသူများအား မုန့် ဟင်းခါး၊ ဘူးသီးကြော်၊ ကြာဇံကြော်၊ ဆီထမင်း၊ မုန့် လက်ကောက်၊ လက်ဖက်ရည်တို့ ဖြင့် ဧည့်ခံကျွေးမွေးခဲ့သည်။

 

ဆီမီး ၁၀၀၀ ပန်း ၁၀၀၀ တန်ဆောင်တိုင်ပွဲတော်ကို ဗုဒ္ဓဘာသာမြန်မာဘုန်းကြီးကျောင်း၊ L.A. Organizers for Burma မိသားစုနှင့် မန္တလေးဂေဇတ်သတင်းစာတို့ ကဦးဆောင် စီစဉ်ခြင်းဖြစ်ပြီး  စေတနာထက် သန်သူ မြန်မာမိသားစုများမှ ပံ့ပိုးခြင်းဖြင့် နှစ်စဉ်မပြတ်ကျင်းပနိုင်ခဲ့ခြင်း ဖြစ်ပါသည်။ ပွဲတော်တွင် အမိ
မြန်မာပြည်ကို အစဉ်သတိရသည့်အနေဖြင့် မြန်မာပြည်မြေပုံနှင့်ချိုးငှက်၊ ငြိမ်းချမ်းပါစေ အမိမြေ စာတန်း တို့ ဖြင့် ထွန်းညှိဆုတောင်းခဲ့သည်။ 


 ပွဲတော်သို့ တက်ရောက်ဆင်နွဲသူများ ခန့် မှန်းထားသည်ထက်များပြားခြင်း၊ မအားလပ်သည့်ကြားထဲက စီစဉ်ဆောင်ရွက်ကြရခြင်းတို့ ကြောင့် အစားအသောက်မနိုင်နင်းမှု၊ မီးထွန်းမှုမပြည့်စုံမှု၊ အသံချဲ့ စက် အားနည်းမှု၊ စသည့်အခက်အခဲတချို့ ကြုံတွေ့ ရပါသည်။ လုပ်အားကုသိုလ်ယူကြသောသူများ၊ အထူး သဖြင့်အကျွေးအမွေးတာဝန်ယူကြသူများအားလုံး ပင်ပန်းကြသော်လည်း ပွဲတော်မှာ စည်ကားသည့် အတွက် ပျော်ရွှင်ပြီး ပင်ပန်းရကျိုးနပ်ကြောင်း သိရပါသည်။ ဆီမီး ၁၀၀၀ ပန်း ၁၀၀၀ တန်ဆောင်တိုင် ပွဲတော်ကို နောက်နှစ်တွင် ဒီထက်ပိုမိုပီပြင် အောင်မြင်စွာကျင်းပသွားမည်ဖြစ်ကြောင်း စီစဉ်သူများမှ သိရှိရပါသည်။ 


Los Angeles မြို့ ကဲ့သို့ ပြည်ပနိုင်ငံ မြို့ တမြို့ တွင်ရိုးရာမပျက်တန်ဆောင်တိုင်ပွဲတော်ကို အေးချမ်း လွတ်လပ်စွာကျင်းပနိုင်သလို ပြည်တွင်းတွင်လည်း ငြိမ်းချမ်းစွာကျင်းပနိုင်ကြပါစေ လို့  ပွဲတော်လာသူတဦး က မှတ်ချက်ဆုတောင်းပေးသွားပါသည်။



ငြိမ်းချမ်းပါစေ အမိမြေ...
(ဒေါင်းဂွင်)
ဓါတ်ပုံ
ကိုမိုး
မောင်မောင်ကြည်
ဒေါင်းဂွင်






Tuesday, July 9, 2013

၈လေးလုံး ငွေရတုအကြို ၈၈ မျိုးဆက်ကျောင်းသားခေါင်းဆောင်များနှင့် တွေ့ ဆုံပွဲ (LOS ANGELES, 7 July, 2013)

၈၈၈၈ ငွေရတုအကြို ၈၈မျိုးဆက်ကျောင်းသားခေါင်းဆောင်များနှင့် LA မြန်မာမိသားစုများတွေ့ ဆုံပွဲ (Los Angeles, July 7, 2013)

LA Organizers ဓာတ်ပုံသတင်း၊ ဇူလိုင် ၉ ၊ ၂၀၁၃

 ၈လေးလုံး ငွေရတုအကြို ၈၈ မျိုးဆက်ကျောင်းသားများနှင့် မြန်မာမိသားစုများတွေ့ ဆုံပွဲကို Los Angeles မြို့ ၌ ဇူလိုင် ၇ ရက်နေ့ တွင်ကျင်းပခဲ့ရာ San Diego မြို့ မှ ၈၈  မျိုးဆက်ကျောင်းသားများကလည်း တကူးတက လာရောက် တက်ရောက်ကြသည်။ တွေ့ ဆုံပွဲသညေ် အခမ်းအနားပုံစံမျိုးမဟုတ်၊ မိန့် ခွန်းပြော၊ နှုတ်ဆက်၊ ပြန်သွား ခေါက်ရိုးကျိုး ပုံစံမျိုးမဟုတ်ပဲ တက်ရောက်သူနှင့် စကားပြောသူများ အပြန်အလှန် ရင်းနှီးစွာ ဆွေးနွေးသည့် တွေ့ ဆုံပွဲဖြစ်သည်။

အကျိုးဆက်အဖြစ် ရှေ့ ဆက် ၈၈မျိုးဆက်လှုတ်ရှားမှုများနှင့် ချိပ်ဆက် ဆောင်ရွက်နိုင်ရန်အတွက် ဆက်သွယ်မှု ကွန်ယက်ဖွဲ့ နိုင်ရန် ဆွေးနွေးတိုင်ပင်ခဲ့ကြသည်။

ကိုမင်းဇေယျာနှင့်ကိုပြုံးချိုတို့ က ၈၈မျိုးဆက်ကျောင်းသားများ၏ ခံယူချက်၊ ရပ်တည်ချက်၊ လက်ရှိအခြေအနေ၊ အခက်အခဲ၊ ရှေ့ လုပ်ငန်းစဉ်များကို တင်ပြဆွေးနွေးခဲ့ကြပြီး ကိုအံ့ဘွယ်ကျော်က ငွေရတု အခမ်းအနားနဲ့ ပတ်သက်၍ အသေးစိပ်တင်ပြဆွေးဆွေးခဲ့သည်။

ကနေဒါနိုင်ငံ တိုရွန်တိုမြို့ တွင်ပြုလုပ်ခဲ့သော ၈၈ မျိုးဆက်ညီလာခံသို့ တက်ရောက်ခဲ့သူ မစီစီအေးကလည်း သူ့ ရဲ့အတွေ့ အကြုံများကို ရှင်းပြခဲ့သည်။

ထို့ နောက် အမေးအဖြေကဏ္ဍကို အချိန်ယူပြီးမေးသမျှမေးခွန်းများကို အသေးစိပ်ပြန်လည်ဖြေကြားပေးသည့် အတွက် တက်ရောက်သူများကိုစိတ်တိုင်းကျစေခဲ့သည်။

ကိုပြေငြိမ်းက တက်ရောက်သူများကိုယ်စား ကျေးဇူးတင်စကားပြောကြားခဲ့သည်။

တွေ့ ဆုံပွဲအပြီး အမှတ်တရ
တွေ့ ဆုံပွဲကို သြစတျေးလျှနိုင်ငံမှ နိုင်ငံတကာရောက် ၈၈ မျိုးဆက် ပူးပေါင်းဆောင်ရွက်ရေး လုပ်ငန်းကော်မီတီ၏ကိုယ်စားလှယ် ကိုစိုးလွင် (၀ဲအစွန်) လည်းတက်ရောက်ခဲ့ပြီး တွေ့ ဆုံပွဲ စ-လယ်-ဆုံး ကူညီဆောင်ရွက်ပေးခဲ့သည်။

 
တွေ့ ဆုံပွဲစီစဉ်သူများမှ ၈၈ မျိုးဆက်ကျောင်းသားများအတွက် ဂုဏ်ပြုလက်ဆောင်ကူညီငွေများကိုကောက်ခံပေးခဲ့ပြီး ကောက်ခံရရှိငွေများအားလုံးကို ကျောင်းသားများအား လွဲပြောင်းပေးအပ်ခဲ့သည်။

 
   တွေ့ ဆုံပွဲတွင် လက်ဖက်ရည်နှင့်ဆီထမင်းတို့ ဖြင့် ဧည့်ခံကျွေးမွေးခဲ့ပြီး ညနေ ၄ နာရီခွဲတွင် အောင်မြင်စွာ ပြီးဆုံးစေခဲ့သည်။
(မိုးမခသတင်းမီဒီယာမှ ပြန်လည်ဖော်ပြသည်)